Археолозите открија кралска гробница во Египет стара 3.500 години

ИСТАНБУЛ (АА) – Министерството за туризам и антиквитети на Египет вчера објави дека откриле историска кралска гробница стара 3.500 години, јавува Анадолу.

Во соопштение, Министерството информираше дека заедничкиот египетско-американски археолошки тим од Универзитетот во Пенсилванија открил кралска гробница од вториот среден период во некрополата Џебел Анубис во Абидос, јужен Египет.

Исто така, археолошкиот тим открил работилница за грнчарство од римската ера во селото Банауит, кое се наоѓа во јужниот дел на земјата.

Во соопштението се истакнува дека откритието на кралската гробница во Абидос дава нови научни докази за развојот на кралските гробници во некрополата Џебел Анубис, каде што овие гробници датираат од периодот меѓу 1700 и 1600 година пред нашата ера.

Што се однесува до грнчарската работилница во Банауит, во соопштението се наведува дека таа била еден од најголемите производствени центри што обезбедувале грнчарија и стакло во регионот во древните времиња.

Одвреме-навреме, Египет објавува археолошки откритија, бидејќи неговата територија е богата со артефакти од ерата на древните Египќани и други значајни историски периоди.