Британска поморска агенција: Танкер погоден со беспилотно летало при излегување од Ормускиот Теснец

Еден танкер беше погоден со беспилотно летало додека излегувал од Ормускиот Теснец, соопшти денес британската Агенција за поморски трговски операции (УКМТО), јавува Анадолу.

„УКМТО доби информации од воените власти дека еден танкер бил погоден од беспилотно летало (УАВ) додека излегувал од Ормускиот Теснец“, се наведува во предупредувањето на агенцијата.

„На пловилото е предизвикана мала материјална штета, екипажот е безбеден и сите членови се на број, а нема пријавено влијание врз животната средина“, се додава.

Инцидентот бил пријавен вчера во 15:52 часот по Гринич, додека предупредувањето било издадено денес.

УКМТО не го идентификуваше танкерот ниту соопшти кој е одговорен за нападот.

„На пловилата им се советува да пловат со претпазливост и да пријават каква било сомнителна активност до УКМТО“, соопшти агенцијата.

Во Ормускиот Теснец се зголемија тензиите во услови на војната меѓу САД и Иран, што предизвикува стравувања од нарушување на поморскиот сообраќај и глобалните енергетски резерви и покрај дипломатските напори за постигнување договори за непречено пловење низ овој стратегиски воден пат.