Бројот на жртви во Газа се доближува до 52.900, Израел уби уште 33 Палестинци

АНКАРА (АА) – Најмалку 52.862 Палестинци се убиени во геноцидната војна на Израел од октомври 2023 година, соопшти денес Министерството за здравство во Газа, јавува Анадолу.

Министерството истакна дека 33 лица се убиени во израелските напади во енклавата во последните 24 часа, додека 94 се повредени, со што вкупниот број на повредени во израелските напади се искачи на 119.648.

„Многу жртви сѐ уште се заробени под урнатините и на патиштата, бидејќи спасувачите не можат да стигнат до нив“, додаде Министерството.

Израелската армија ги продолжи нападите врз Појасот Газа на 18 март и оттогаш уби 2.749 лица, а повреди над 7.600, кршејќи го договорот за прекин на огнот и размена на затвореници што стапи на сила во јануари.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата за своите воени дејства во енклавата.