Бројот на загинати во земјотресите во Сирија порасна на 3.688

АФРИН/АНКАРА (АА) - Најмалку 3.688 луѓе загинаа, а 14.749 се повредени во Сирија во серијата силни земјотреси со епицентар на југот на Туркије кои минатиот понеделник го потресоа поширокиот регион, јавува Анадолу.

Во Сирија продолжува потрагата по преживеани и отстранувањето на урнатините во покраините Идлиб, Алепо, Хама, Латакија и Тартус.

Според податоците на Сириската мрежа за човекови права (SNHR), најмалку 2.274 луѓе загинале во Идлиб и во зоните на операцијата „Штитот на Еуфрат“ и „Маслинова гранка“ во северна Сирија, а повеќе од 12.400 луѓе се повредени.

Многу згради се уништени или оштетени во подрачјата под контрола на опозицијата на северот на Сирија.

Новинската агенција САНА објави дека во земјотресот во регионите под контрола на режимот во покраините Алепо, Латакија, Хама и Тартус загинале 1.414 луѓе, а 2.349 се повредени.