Висок лидер на Хамас и палестински пратеник убиен во израелски воздушен напад врз јужна Газа

АНКАРА (АА) – Високиот претставник на Хамас и палестински пратеник Салах ал-Бардавил е убиен во израелски воздушен напад врз западен Кан Јунис во јужниот дел на Појасот Газа, објави дене палестинската група на отпорот, јавува Анадолу.

Хамас соопшти дека Бардавил, член на Политичкото биро и пратеник во Палестинскиот законодавен совет, бил убиен во „таргетиран напад при ноќна молитва во неговиот шатор во областа Ал-Маваси“. Во нападот е убиена и неговата сопруга, додава Хамас.

Воздушниот напад е дел од тековното израелско бомбардирање на Газа, кое се интензивираше во последните денови.

Хамас го осуди нападот нарекувајќи го „кукавички ционистички напад“ и рече дека Израел „врши воени злосторства во рамките на систематска кампања на масакри“ во Газа.

Над 700 Палестинци се убиени, а над 1.000 се повредени во ненадејната воздушна кампања на Израел врз Газа од вторникот, која го прекрши договорот за прекин на огнот и размена на затвореници што стапи на сила во јануари.

Речиси 50.000 Палестинци се убиени, главно жени и деца, а над 113.000 се повредени во бруталната израелска воена офанзива врз Газа од октомври 2023 година.

Меѓународниот кривичен суд во ноември минатата година издаде налози за апсење за израелскиот премиер Бенјамин Нетанјаху и неговиот поранешен министер за одбрана, Јоав Галант, за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.