Во Дубаи започна Светскиот самит на влади 2026

ИСТАНБУЛ (АА) – Светскиот самит на влади 2026 официјално се отвори денес во Дубаи, Обединетите Арапски Емирати, под мотото „Обликување на владите на иднината“, со што се бележи најголемото меѓународно учество во историјата на овој настан, јавува Анадолу.

На тридневниот самит, што се одржува од 3 до 5 февруари, ќе учествуваат повеќе од 6.250 носители на одлуки и експерти, меѓу кои над 60 шефови на држави и влади и нивни заменици, повеќе од 500 министри, како и претставници од над 150 влади, соопшти државната новинска агенција на ОАЕ, ВАМ.

Ова досега претставува најголема застапеност на политички лидери од основањето на самитот во 2013 година.

Учесниците се очекува да разговараат за глобалните трендови, да ги разгледаат светските предизвици и да ја истражат улогата на владите во обликувањето на одржливиот развој на заедниците.

Годинешното издание вклучува и доделување награди во четири категории: Награда за најдобар министер, Глобална награда за најреформирана влада, Меѓународна награда за најдобри практики во одржливиот развој во Дубаи и Светска награда за наставници.