Во израелски напад врз Појасот Газа убиени новинар и снимател на Ал Џезира

ГРАД ГАЗА (АА) - Новинар и снимател на катарската телевизија Ал Џезира се убиени вчера во израелски воздушен напад врз градот Газа, пренесува Анадолу.

Телевизијата со седиште во Доха соопшти дека новинарот Исмаил ал-Гул и снимателот Рами ал-Рифи се убиени во нападот. Сè уште не се достапни детали за околностите на нивната смрт.

Владината канцеларија за медиуми во Газа соопшти дека по новите смртни случаи бројот на палестински новинари убиени во израелските напади од 7 октомври е зголемен на 165.

Прекршувајќи ја резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Газа од нападот на палестинската група Хамас на 7 октомври 2023 година.

Според локалните здравствени власти, оттогаш се убиени повеќе од 39.400 Палестинци, главно жени и деца, а околу 91.000 се повредени.

Израел е обвинет за геноцид пред Меѓународниот суд на правдата, со чија последна пресуда му се наложи веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнениот напад врз градот на 6 мај.