ИСТАНБУЛ (АА) - Во Појасот Газа, кој веќе 27 дена е под жестоки израелски напади, животот го загубија уште 265 лица, со што вкупната бројка на загинати Палестинци се зголеми на 9.061, известува Анадолу.
Ашраф ал Кудра, портпарол на Министерството за здравство во Газа, ги сподели последните информации за жртвите и повредените во регионот на прес-конференцијата одржана во болницата Шифа.
Кудра рече дека уште 265 лица ги загубиле животите во нападите што Израел ги изведе во последните 24 часа.
Палестинскиот функционер наведе дека бројката на убиени лица во израелските напади на Газа од 7 октомври досега е зголемен на 9.061, од кои 3.760 се деца, 2.326 се жени, а најмалку 32.000 се повредени.
Израел соопшти дека во нападите изведени од Газа животот го загубиле повеќе од 1.400 Израелци, а 5.132 се повредени.
Конфликтот во Газа, која е под израелско бомбардирање и опсада од 7 октомври, започна кога бригадите Ал-Касам, вооруженото крило на Хамас, ја почна операцијата „Поплава Ал Акса“, ненадеен напад со низа лансирања на ракети и инфилтрирање во Израел преку копно, море и воздух.
Израелската војска како одговор ја започна операцијата „Железни мечеви“ кон позициите на Хамас во Појасот Газа. Оваа операција доби димензии на неселективно бомбардирање на цивилни населби, станбени објекти, џамии, цркви и болници.
