Esra Taşkın
04 Ноември 2025•Ажурирај: 05 Ноември 2025
ПАРИЗ (АА) - Во Париз денес започна судењето против француската фабрика за цемент „Лафарж“, обвинета дека ја финансирала терористичката организација ДЕАШ и прекршила меѓународни санкции преку своите операции во Северна Сирија, јавува Анадолу.
Судењето, кое ќе трае до 16 декември, ќе го испита случајот против „Лафарж“ како правно лице, заедно со осуммина поединци.
Меѓу обвинетите се четворица поранешни француски извршни директори на компанијата, двајца сириски посредници обвинети дека преговарале со вооружени групи во име на „Лафарж“, како и двајца безбедносни службеници – еден од Јордан и еден од Норвешка.
Според заедничкото соопштение на антикорупциската организација „Шерпа“ и Европскиот центар за уставни и човекови права со седиште во Берлин, кои го иницираа случајот по речиси деветгодишна правна постапка, процесот претставува „уникатна можност француското правосудство да ја испита одговорноста на мултинационалните компании што работат во конфликтни зони“.
Во соопштението се додава дека судењето е „клучен момент“ и за поранешните вработени во „Лафарж“ што биле погодени од активностите на компанијата во Сирија, при што се очекува повеќе сириски работници да сведочат за своите искуства.
Понатаму се нагласува дека посебната истрага против „Лафарж“ за наводно соучество во злосторствата против човештвото сè уште е во тек, прва од ваков вид во светот.
Осумтемина обвинети поединци се соочуваат со можни казни до 10 години затвор и парични казни до 225.000 евра доколку бидат прогласени за виновни за финансирање тероризам.
Компанијата „Лафарж“ како правно лице би можела да биде казнета со парична казна до 1,125 милиони евра и дополнителни санкции.
Во случај на осуда за прекршување на меѓународните финансиски санкции, компанијата би можела да се соочи со казна и до десеткратниот износ на нелегалните трансакции – околу 46 милиони евра.
Поранешните директори обвинети за ова дело се соочуваат со казни до пет години затвор, високи парични казни и можност за конфискација на имот стекнат преку наводните прекршоци.
