Газа: Голем број Палестинци убиени и ранети во израелските напади во текот на ноќта

ИСТАНБУЛ (АА) - Многу луѓе загинаа и беа ранети во нападите на израелската војска во централните и јужните региони на Појасот Газа во текот на ноќта, јавува Анадолу.

Веќе 283 дена Израел продолжува со нападите врз Појасот Газа, каде што предизвика голема хуманитарна катастрофа.

Според веста на државната палестинска агенција ВАФА, израелската војска извршила напади врз населбите Тел ел Хева, Шеик Ајлин и Ес-Сабра во Газа. Многу луѓе се убиени или повредени во овие напади.

Израелски хеликоптери отворија оган врз жителите на Газа на отворен простор во Тел ел-Хева. Израелските артилериски единици бомбардираа и подрачје во областа Зејтун во Газа.

Има загинати и ранети во напад на израелски воени авиони врз бегалскиот камп Ал-Мегази во Газа.

Екипите за прва помош продолжуваат со потрага и спасување во нападнатите подрачја.

Тие сè уште не потврдија точно колку Палестинци се загинати во овие напади.

Во израелските напади врз Појасот Газа од 7 октомври загинаа 38.584 Палестинци, од кои најмалку 15.694 деца и 10.279 жени, а повредени се 88.881 лице.