Mohammad Sıo
03 Декември 2025•Ажурирај: 04 Декември 2025
ЕРУСАЛИМ / ИСТАНБУЛ (AA) – Гинисовата книга на рекорди донела одлука да ги прекине сите свои активности поврзани со Израел и да запре со прием на пријави на рекорди од земјата, пренесоа израелските медиуми денес, јавува Анадолу.
Според израелската телевизија „Канал 12“, добротворната организација „Подарок на животот“, која промовира донации на бубрези, се обидела да регистрира значаен успех – 2.000 израелски донори кои помогнале да се спасат животи преку трансплантација.
Организацијата соопшти дека барањето „било одбиено од политички причини“.
Групата платила такси и организирала церемонија во Ерусалим за да ги фотографира сите 2.000 донатори заедно за да бидат вклучени во Гинис, но добила е-пошта од Гинис во која се вели: „Моментално не обработуваме апликации за рекорди од Израел“.
Оттука, организацијата се обидувала да добие појаснување и да утврди дали одлуката може да биде повлечена, но, како што велат, досега не добиле никаков одговор.
Рабинката Рахел Хабер, која ја предводи групата, ја оценила одлуката на Гинис како „неприфатлива“.
Од Гинисовата книга на рекорди досега не излезе официјален коментар во врска со обвинувањата.
Овие наводи се појавуваат во период кога Израел се соочува со сè поголема меѓународна изолација поврзана со двегодишната воена офанзива во Газа, која резултираше со академски, културни, политички и спортски бојкоти.
Според податоците од властите во Газа, од октомври 2023 година израелската Армија убила повеќе од 70.000 Палестинци, најголем дел жени и деца, а повредени биле над 171.000. Бруталната офанзива ја претвори енклавата во урнатини, пред да стапи во сила прекинот на огнот на 10 октомври.
