Градоначалникот на Киев: „Жителите почнаа да се враќаат во своите домови“

КИИВ (АА) - Жителите на главниот град на Украина, Киев, почнаа да се враќаат во своите домови откако се засолнија на побезбедни места, откако Русија ја започна војната, изјави градоначалникот на градот, Витали Кличко, јавува Агенција Анадолија (АА).

Истакнувајќи дека во Киев во моментов има 2,1 милион луѓе, Кличко рече дека градот полека се враќа во живот бидејќи повеќето жители се вратиле.

Тој рече дека сепак треба да се земе предвид дека Киев е под закана од ракетни напади, апелирајќи до жителите кои се на побезбедни места да не брзаат да се вратат дома.

Кличко рече дека прават сѐ за да ги обезбедат потребните услуги за жителите, вклучително и продолжување на работното време на метрото.

„Не се сите мостови отворени за сообраќај. Градот има многу барикади неопходни за одбрана и безбедност“, додаде тој.

Најмалку 2.104 цивили загинаа, а 2.862 се повредени во Украина досега во војната што започна на 24 февруари, според проценките на ОН, а се верува дека вистинската бројка е многу поголема.

„Повеќе од 4,9 милиони Украинци побегнаа во други земји, а над 7 милиони се внатрешно раселени“, соопшти Агенцијата за бегалци на ОН.