Двајца припадници на американската морнарица приведени поради шпионирање за Кина

ЊУЈОРК (АА) - Двајца припадници на американската морнарица се приведени под обвинение дека ѝ пренесувале чувствителни воени информации на Кина, соопшти во четвртокот американското Министерство за правда, пренесува Анадолу.

Активниот маринец Џинчао Веи, познат и како Патрик Веи, обвинет е за заговор поради праќање информации за американската национална одбрана на разузнавачки службеник што работел за Кина, се наведува во обвинението.

Во одвоени случаи, припадникот на морнарицата Венхенг Џао, познат и како Томас Џао (26), обвинет е за примање мито во замена за пренесување чувствителни информации на разузнавачки службеник од Кина.

„Двајцата се обвинети дека ја прекршиле обврската што ја презеле за да ги заштитат САД и поради тоа што ја издале довербата на јавноста, во корист на Народна Република Кина“, изјави помошникот државен обвинител Метју Олсен.