Ekip
27 Јануари 2025•Ажурирај: 28 Јануари 2025
ГАЗА (АА) - Рано утринава започна враќањето на десетици илјади Палестинци, кои се раселени поради нападите на Израел врз Појасот Газа, во нивните домови на север, јавува Анадолу.
На снимката е прикажан Палестинец, кој бил принуден да мигрира во јужна Газа, кој по добиената дозвола сега се враќа на север, каде што повторно ќе биде со мајка му по неколкумесечната разделба.
Утринава илјадници Палестинци почнаа да се враќаат во северниот дел на Појасот Газа како дел од прекинот на огнот помеѓу Израел и палестинската група Хамас што стапи на сила на 19 јануари.
Според сведоците и дописникот на Анадолу од терен, од 7 часот наутро по локално време илјадници луѓе се движат пешки кон северна Газа по крајбрежната улица Ал-Рашид.
Палестинските активисти на социјалните мрежи поставија снимки од луѓе што скандираат и прославуваат додека се враќаат во своите области.
Првата шестнеделна фаза од договорот за прекин на огнот во Газа стапи на сила на 19 јануари, со што е запрена геноцидната војна на Израел во која се убиени речиси 47.300 Палестинци, главно жени и деца, а повредени се повеќе од 111.400 од 7 октомври 2023 година.
Првиот ден од прекинот на огнот Израел ослободи 90 палестински затвореници во замена за тројца израелски заробеници што ги ослободи Хамас.
Втората група од 200 палестински затвореници беше ослободена на 25 јануари.
Во договорот за прекин на огнот во три фази е предвидена размена на затвореници и одржлива смиреност, со цел за трајно примирје и повлекување на израелските сили од Газа.
Во израелските напади исчезнаа 11.000 луѓе, предизвикани се широко распространето уништување и хуманитарна криза во кои животот го загуби огромен број постари луѓе, жени и деца.
Во ноември минатата година Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата за неговата војна против енклавата.
