Ердоган: „Турција е за тоа прашањето за Кашмир да се реши преку дијалог“

ИСЛАМАБАД (АА) - Турскиот претседател Реџеп Таип Ердоган изјави дека Турција поддржува решавање на прашањето на Кашмир преку дијалог, во согласност со резолуциите на Обединетите нации (ОН) и очекувањата на браќата од Кашмир, јавува Агенцијата Анадолија (АА).

• Пакистанскиот премир Кан: „Осум милиони луѓе во Кашмир живеат во затвор од отворен тип“
• Ердоган во Пакистан: „Ниту еден инвеститор не се покајал поради доаѓањето во Турција“
• Ердоган: „Наметнувањето на ‘Мировниот план на векот’, не е ништо друго туку проект за окупација“

Тој исто така нагласи дека Турција и Пакистан имаат одлични односи, за што, како што рече, најдобро говори фактот дека за време на неговата посета на земјата потпишани се 13 договори за соработка.

„Стратешката економска рамка и текстовите на акциониот план што ги потпишавме претставуваат Мапа на патот за продлабочување на нашите економски односи“, рече Ердоган пред новинарите по состанокот на Советот за стратешка соработка на високо ниво, на кој присуствуваше и премиерот на Пакистан, Имран Кан.

Нагласи дека Турција е подготвена да го поддржи економскиот и општествениот развој на Пакистан преку соработка во областа на транспортот, енергетиката, туризмот, образованието, здравството и другите сектори.

„Како што беше и досега, Турција и денес и утре, и кога било ќе биде покрај Пакистан“, рече Ердоган.

Тој потсети дека Пакистан бил покрај Турција во тешките моменти, по земјотресот во градот Елазиг и по обидот за пуч на терористичката организација ФЕТО.

„Уште еднаш би сакал да го изразам задоволството што Пакистан вложува големи напори во рамките на борбата против тероризмот и заканите за регионалната стабилност“, додаде турскиот претседател.

Да потсетиме, пакистанскиот претседател Ариф Алви вчера организираше прием во Исламабад во чест на турскиот претседател Реџеп Таип Ердоган, кој прстојуваше во посета на земјата.

Лидерите се согласија дека Пакистан и Турција мора да продолжат со блиската соработка во однос на предизвиците со кои се соочуваат муслиманите, вклучително и исламофобијата. Тие потврдија дека двете држави ќе продолжат да даваат меѓусебна поддршка по прашањата на основните национални интереси.

Тие ја истакнаа и важноста од целосно реализирање на големиот потенцијал на односите помеѓу Пакистан и Турција, и нивно претворање во силно и динамично трговско и економско партнерство.