ЕУ го повика Израел да стави крај на изградбата на нелегални населби во Западниот Брег

БРИСЕЛ (АА) - Европската Унија (ЕУ) ги повика израелските власти итно да запрат со нелегалната изградба на еврејските населби во подрачјето на окупираниот Западен Брег, пренесува Anadolu Agency (AA).

Во соопштението на гласноговорништвото на ЕУ се наведува дека израелските власти во текот на октомври одобриле изградба на нова еврејска населба на Западниот Брег со капацитет од 2.000 станбени единици.

„Ставот на Европската Унија за израелската изградба на населби на окупираниот Западен Брег е јасен и непроменет. Изградбата на населбите е нелегална според меѓународното право и како таква ја загрозува перспективата за градење траен мир врз основа на воспоставување на две независни држави“, се наведува во соопштението.

ЕУ најави дека и понатаму ќе продолжи да ја поддржува идејата за воспоставување две држави предвидени со резолуцијата на Советот за безбедност при Обединетите нации (ОН).

Израел во 1967 година ги окупира Западниот Брег и Источен Ерусалим. Досега, израелските власти имаат изградено над 100 нелегални населби во кои живеат околу 650.000 еврејски доселеници.

Палестинските власти, пак, бараат на подрачјето на Западниот Брег и Газа да се признае независност на палестинската држава.