Здравствените власти започнаа евакуација на пациентите од Европската болница во Појасот Газа

ГАЗА (АА) - Медицински и технички тимови почнаа евакуација на пациентите од Европската болница во градот Кан Јунис во Појасот Газа доцна синоќа пред можен израелски копнен напад, јавува Анадолу.

Израелската војска тврди дека не издала наредба за евакуација на болницата.

Меѓутоа, медицинските тимови почнаа да ги евакуираат пациентите, повредените лица и дел од болничката опрема бидејќи болницата се наоѓа во едно од подрачјата, каде што жителите добија текстуални предупредувања од израелските власти да се префрлат на друго место.

Медицински извори изјавија за Анадолу дека медицинските екипи пренеле пациенти и повредени во болницата Насер во централниот дел на Кан Јунис.

Тие додадоа дека техничките тимови на болницата, исто така, преместиле и некои медицински уреди и опрема поради страв дека ќе бидат оштетени доколку израелската војска упадне во болницата.

Раселените лица ги демонтираа своите шатори околу болницата и се преселија на други локации откако претходно истиот ден добија наредба од израелската војска да се евакуираат.

Европската болница во Кан Јунис е една од ретките што функционираат во Појасот Газа бидејќи израелската војска намерно и систематски цели на повеќето болници во блокираната енклава за време на воените операции, при што повеќето од нив ги оставаат надвор од функција.

Израелската војска вчера им нареди на жителите во источниот дел на Кан Јунис веднаш да го напуштат тоа подрачје, тврдејќи дека подрачјето станало „опасна борбена зона“.

Војската побара од луѓето да се упатат кон подрачјата познати како хуманитарни зони во западниот дел на градот, познати како Ал-Маваси.

Прекршувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда за неговата континуирана брутална офанзива врз Појасот Газа од нападот на Хамас на 7 октомври 2023 година.

Оттогаш се убиени најмалку 37.900 Палестинци.

Во израелските напади што траат повеќе од осум месеци големи делови од Појасот Газа се во урнатини, а влезот на храна, чиста вода и лекови во енклавата е блокиран.

Израел е обвинет за геноцид пред Меѓународниот суд на правдата, чија последна пресуда му наложи на Тел Авив веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од нападите.