Betül Yılmaz
02 Декември 2025•Ажурирај: 02 Декември 2025
ИСТАНБУЛ (АА) – Израелската Армија денес изврши нов прекуграничен упад во јужна Сирија и уништи напуштен воен пункт, иако американскиот претседател Доналд Трамп претходно повика на воздржаност, пренесува Анадолу.
Државната телевизија Аликхбарија објави дека два израелски тенка и 10 воени возила влегле во селото Самданија ал-Шаркија во јужниот дел на покраина Кунејтра. Нема официјална реакција ниту од израелската Армија, ниту од сириските власти.
Упадот следува еден ден по серијата упади врз две села во Кунејтра, како дел од речиси секојдневните израелски операции во јужните делови на Сирија во последните неколку месеци.
Вчера Трамп повика на регионална воздржаност.
„Многу е важно Израел да одржува силен и искрен дијалог со Сирија и да не се презема ништо што би го попречило напредокот на Сирија кон просперитет“, изјави тој.
Трамп го пофали сирискиот претседател Ахмед ал-Шара, наведувајќи дека „вредно работи“ за да обезбеди „добри резултати“ за двете земји.
„Ова е историска можност, за мир на Блискиот Исток“, додаде тој.
Според сириските државни податоци, од декември 2024 година Израел извршил повеќе од 1.000 воздушни напади и над 400 прекугранични рации во јужните сириски провинции.
По падот на режимот на Башар ал-Асад кон крајот на 2024 година, Израел ја прошири својата окупација на сириската Голанска Висорамнина со заземање на демилитаризираната тампон-зона, потег со кој се прекрши договорот со Сирија од 1974 година.
