Известувачите на ОН го осудија намерното изгладнување и дехидратација на Палестинците од страна на Израел

ЖЕНЕВА (АА) - Известувачите на Обединетите нации (ОН) го осудија намерното изгладнување и дехидратација на Палестинците од страна на Израел, опишувајќи го ова како злосторство против човештвото, известува Анадолу.

Известувачите на ОН објавија писмено соопштение во врска со состојбата на палестинскиот народ, кој е под израелски напад и се соочува со глад.

Во објавата се истакнува дека Израел ја користи жедта како оружје за убивање на Палестинците, наведувајќи:

„Го осудуваме намерното изгладнување и оставање без вода на Палестинците од страна на Израел. Загрижени сме за намерното немање пристап до безбедна вода за пиење од страна на Израел за Палестинците во Газа и ова го опишуваме како сериозно кршење на меѓународното право и злосторство против човештвото.“

Во објавата се нагласува дека блокирањето на водата и храната е тивка, но смртоносна бомба што убива претежно деца и доенчиња и дека е неподносливо гледањето како бебињата умираат во рацете на нивните мајки.

„Како можат светските лидери да спијат додека продолжува ова страдање? Оваа катастрофа беше предвидена. Блокадата и уништувањето на цивилната инфраструктура од страна на Израел ги раселија повеќето од два милиона жители на Газа и ги оставија без пристап дури и до минимално количество вода за пиење. Ова доведе до смртни случаи и широко распространети болести предизвикани од загадување на водата, како и недостиг на санитација и хигиена. Овие намерни, широко распространети и систематски напади врз Палестинците, намерно кршење на условите за живот, се уште еден чин на геноцид, насочен кон физичко уништување на населението“, се вели во соопштението.

Во соопштението, во кое се повикува на итен трансфер на гориво, вода, резерви и персонал од сите медитерански пристаништа за да се обноват основните услуги во Газа и да се задоволат итните хуманитарни потреби, се истакнува дека меѓународната заедница мора да преземе мерки за да се стави крај на оваа нехумана и незаконска ситуација во Газа.

- Во Газа има криза со глад

Во видеото што израелскиот премиер Бенјамин Нетанјаху го сподели на својот профил на платформата Х, тој изјави: „Нема глад во Газа, во Газа не се спроведува политика на глад.“

Појасот Газа е под израелски напади и строга опсада што го ограничува доставувањето на хуманитарна помош. Палестинската енклава доживува хуманитарна катастрофа, со широко распространет глад и недостиг на вода, лекови, медицински материјали и хигиенски средства.

Во Појасот Газа се зголемуваат смртните случаи од глад, особено кај децата.

Од 7 октомври 2023 година 147 Палестинци починале од глад во Појасот Газа, каде што Израел го блокира влезот на хуманитарна помош.

Локалните и меѓународните кругови наведуваат дека Израел ги користи „гладот и жедта како оружје“.