Израел е подготвен по дипломатски пат да го реши проблемот со Хезболах

КУДС (АА) - Израелскиот министер за одбрана, Јоав Галант, вчера го извести главниот советник на претседателот на САД, Амос Хохштајн, дека Тел Авив е подготвен да го реши проблемот со либанската група Хезболах по дипломатски пат, пренесува Анадолу.

Министерот Галант се состана со Хохштајн во Тел Авив за да разговара за безбедносниот проблем на либанската граница и начините раселените Израелци да се вратат во своите домови, се вели во соопштението на Канцеларијата на Министерството за одбрана.

„Подготвени сме по дипломатски пат да ги решиме проблемите со Хезболах на југот од Либан, но подготвени сме и за други сценарија“, порача Галант.

Тој истакна дека неговата земја е одлучна да ја подобри безбедноста на либанската граница и да ја отстрани заканата од нападите.

Од 8 октомври минатата година израелско-либанската граница е жариште на повремени тензии и спорадична размена на огнот меѓу израелската војска, од една страна, и Хезболах и палестинските фракции, од друга страна.