Израел ослободи 19 Палестинци заробени за време на офанзивата во Појасот Газа

ГАЗА (АА) - Израел ослободи 19 Палестинци кои ги зароби во Појасот Газа, кој е цел на континуирани израелски напади од 7 октомври, јавува Анадолу.

Локалните извори јавуваат дека израелските војници ослободиле 19 Палестинци во воената област Кисуфим, источно од Деир ал Белаха.

Палестинците за кои е утврдено дека здравствената состојба им е лоша се донесени во болницата „Шехид Ал Акса“. На телата на Палестинците може да се видат траги од мачењето и тортурата што ги доживеале во израелскиот притвор.

Ослободените Палестинци изјавија дека за време на престојот во израелските затвори биле изложени на ужасни процедури, различни методи на тортура, како гладување, тепање и навреди.

Од почетокот на офанзивата во Појасот Газа, израелската армија зароби илјадници Палестинци, вклучително жени, деца, здравствени работници и работници на цивилна заштита. Неколку затвореници се ослободени и сведочат за тортурата во израелските затвори, а судбината на мнозинството не е позната.

Според изјавите на Палестинците кои биле приведени од израелските сили, а подоцна ослободени, тие биле подложени на тепање, тортура, навреди и испрашувања од страна на израелската армија за време на притворот.

Во заедничкиот извештај објавен од Здружението на палестинските затвореници и Делегацијата на затвореници и ослободени лица на Палестинската ослободителна организација по повод „26 јуни - Меѓународниот ден на солидарноста со жртвите на тортура“, беше наведено дека најмалку 18 затвореници ги загубиле животите во израелските затвори и логори од 7 октомври.

Палестинското движење Хамас претходно соопшти дека палестинските затвореници во израелските затвори се подложени на најбрутални и ужасни форми на одмазда, вклучително гладување, понижување, малтретирање, медицинско занемарување и егзекуција.

Најмалку 39.480 Палестинци се убиени, а 91.128 се ранети во израелските напади врз Појасот Газа од 7 октомври досега.