Ikrame Imane Kouachi
12 Октомври 2023•Ажурирај: 12 Октомври 2023
РАМАЛА (АА) - Израелските сили денес приведоа 55 Палестинци на Западниот Брег и во Источен Кудс (Источен Ерусалим), соопштија официјални извори, јавува Анадолу.
„Израелските сили извршија операции на приведување во различни региони на окупираниот Источен Кудс и Западниот Брег“, изјави за Анадолу, Емани Серахине, официјален претставник на Здружението на палестински затвореници.
Серахине објави дека „55 Палестинци биле приведени од израелските сили за време на овие операции“.
Од израелските власти засега нема одговор на овие наводи.
Во услови на драматичната ескалација на тензиите на Блискиот Исток, израелските сили започнаа непрекината и силна воена кампања против Појасот Газа, како одговор на воената офанзива на палестинската група Хамас на израелските територии.
Конфликтот започна кога Хамас ја иницираше операцијата „Поплава Ал-Акса“ против Израел, ненадеен напад од повеќе страни, лансирање ракети и инфилтрации во Израел преку копно, море и воздух, за што Хамас рече дека е одмазда за рациите на џамијата „Ал-Акса“ во окупираниот Источен Кудс (Ерусалим) и растечкото насилство на еврејските доселеници врз Палестинците.
Како одговор на акциите на Хамас, израелската војска ја започна операцијата „Железни мечеви“ против позиции на Хамас во Појасот Газа.
Одговорот на Израел се прошири во прекин на снабдувањето со вода и електрична енергија во Газа, дополнително влошувајќи ги условите за живот во областа која е под строга опсада од 2007 година.
