Израелската Армија ги предупреди Иранците да не го користат железничкиот сообраќај поради можни напади

Израелската Армија утринава ги предупреди граѓаните во Иран да избегнуваат користење возови низ целата земја во текот на следните неколку часа, јавува Анадолу.

Во соопштението објавено на американската компанија за социјални медиуми Х, воениот портпарол Авичај Адри ги повика жителите да не го користат железничкиот транспорт до 21 часот по локално време.

„За ваша безбедност, бараме од вас да не користите возови низ Иран од овој момент до 21 часот по иранско време“, изјави тој.

„Присуството во возовите или во близина на железничките пруги ги изложува вашите животи на ризик“, предупреди Адри.

Во соопштението не беа наведени дополнителни детали за причината за предупредувањето, но ваквите известувања обично доаѓаат пред можни воени напади.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.340 луѓе, вклучувајќи го и тогашниот врховен лидер Али Хамнеи.

Иран возврати со напади со беспилотни летала и ракети насочени кон Израел, како и кон Јордан, Ирак и земјите од Персискиот Залив во кои се наоѓаат американски воени капацитети, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.