Израелците ги продолжија протестите против Нетанјаху по неговото телевизиско обраќање

ТЕЛ АВИВ (АА) - Стотици Израелци се собраа во Тел Авив доцна синоќа против премиерот Бенјамин Нетанјаху откако тој одржа телевизиски говор, јавува Анадолу.

Демонстрантите се судрија со полицијата откако го затворија автопатот Ајалон, главна артерија за градот.

На видеата што кружат на социјалните мрежи тие извикуваа слогани и ја прашуваа полицијата: „Што направивте во 'Ал Акса'?“, мислејќи на неодамнешните рации на израелските безбедносни сили во комплексот на џамијата „Ал Акса“ во Кудс (Ерусалим).

Според весникот Хаарец, приведени се осум демонстранти, додека полициски извори соопштија дека се уапсени две лица.

Демонстрантите во судирот со полицијата, која ги прогласи демонстрациите за нелегални, извикуваа: „Не постои такво нешто како нелегални демонстрации.“

Нетанјаху синоќа имаше телевизиско обраќање во седиштето на израелската армија во Тел Авив и разговараше за неговиот план за судски реформи за поделби.

Тој ја обвини претходната Влада и протестното движење против неговата администрација за неодамнешниот бран терористички напади против Израелците, велејќи дека поради многуте „терористички закани“ со кои се соочува земјата, министерот за одбрана Јоав Галант ќе остане на функцијата, менувајќи ја својата одлука да го отпушти.

- План за обнова на правосудството

Судските реформи, предложени од министерот за правда Јарив Левин на 5 јануари, ќе бидат најрадикална промена досега во системот на владеење во Израел. Доколку бидат усвоени, тие ќе ѝ дадат на Владата непроверени овластувања над судовите и ќе му дадат на Кнесетот, или парламентот, во кој доминира Нетанјаху, ефикасна контрола врз судиските назначувања, а со тоа ќе се ослаби Врховниот суд.

Во изминатите неколку недели во Израел имаше масовни протести против плановите на Владата за спроведување на реформите, што опозицијата го смета за грабање на власта во корист на извршната власт.

Нетанјаху, сепак, инсистира дека неговите судски планови ќе ја подобрат демократијата и ќе ја вратат рамнотежата меѓу законодавната, извршната и судската власт.

На 27 март Нетанјаху, кому му се суди за корупција, потклекна на притисокот и најави привремено запирање на плановите за обнова на судството.