ИДЛИБ/ИСТАНБУЛ (АА) – По години поминати во страдање и тешки услови во бегалски кампови, илјадници сириски цивили почнаа да се враќаат во својата татковина откако во земјата се воспоставени мир и безбедност по падот на режимот на Башар ал-Асад.
Милиони Сиријци беа принудени да ја напуштат својата земја и да побараат прибежиште во соседните држави, бегајќи од масовното уништување и влошената хуманитарна криза за време на владеењето на Асад.
„Живеевме во навистина сурови услови во бегалските кампови. Но сега, фала Богу, нашата земја е ослободена“, изјави Мохамад Рахмон, кој по шест години прогонство се врати во родното село Кафар Сињах, во јужниот дел на областа на Идлиб.
„Се враќаме во нашата татковина, дури и ако е уништена“, рече тој.
Иако селото е речиси целосно уништено од воздушните напади на поранешниот режим, Рахмон планира да постави шатор врз урнатините на својата куќа – како симбол на неговата посветеност на татковината.
Ал-Реззак Мохамед, друг жител на Кафар Сињах, сведочи дека преживеале големи страдања откако во 2019 година биле принудени да ја напуштат Сирија.
„Претрпевме многу – од сурови временски услови до целосен недостиг на инфраструктура“, рече тој.
„Сега се враќаме во нашето село и покрај уништувањето. Бидејќи, колку и да е тежок животот во селото, тој е достоинствен во споредба со животот во бегство“, додаде Мохамед.
„Но задоволството и радоста од враќањето ја надминуваат тагата поради уништувањето“, рече тој.
Башар ал-Асад, кој владееше со Сирија речиси 25 години, побегна во Русија во декември, што го означи крајот на владеењето на партијата Баас, која беше на власт од 1963 година.
Ахмад ал-Шараа, кој ги предводеше антирежимските сили во соборувањето на Асад, беше прогласен за привремен претседател кон крајот на јануари.
