ИРГЦ: Два танкера за нафта експлодираа откако налетале на мини во Ормускиот Теснец

Иранската Исламска револуционерна гарда (ИРГЦ) денес соопшти дека два танкера за нафта експлодирале откако налетале на мини во Ормускиот Теснец и ги предупреди бродските компании дека ќе преземе дополнителни мерки доколку користат пловни рути низ стратегискиот воден пат кои Техеран ги смета за неовластени, јавува Анадолу.

ИРГЦ во соопштение наведе дека екипажите на двата танкера се симнале од пловилата, кои потоа биле предадени на персонал поврзан со американската Армија за да поминат низ она што го опиша како „нелегална рута“.

Пловилата „налетале на мини, експлодирале и биле запрени“, се наведува во соопштението, при што се додава дека тие се запалиле.

ИРГЦ не ги идентификуваше танкерите ниту даде детали за нивното знаме, точната локација или евентуалните жртви.

Иранската гарда соопшти дека нејзините поморски сили претходно ги предупредиле пловилата за опасностите од минското подрачје.

ИРГЦ исто така се закани со, како што ги нарече, „дополнителни казнени мерки“ против бродските компании кои им дозволуваат на своите пловила да ја користат оваа рута наместо преминот што Техеран го смета за дозволен.

Во соопштението се наведува дека неодамнешните американски воени дејствија нема да ја ослабат контролата на Иран врз Ормускиот Теснец.