Каја Калас: ОН дефинитивно не ги исполнуваат очекувањата како што треба

ИСТАНБУЛ (АА) – Високата претставничка на Европската Унија за надворешна политика, Каја Калас, денес изјави дека Обединетите нации „дефинитивно не функционираат на начинот на кој треба“ и ја истакна потребата од зајакнување на меѓународното право со земјите што се залагаат за поредок заснован на правила, јавува Анадолу.

„Како што слушнавме, Обединетите нации дефинитивно не ги исполнуваат очекувањата како што треба“, рече Калас, говорејќи на Безбедносната конференција во Осло.

Таа посочи дека постојат многу земји кои сакаат поредок заснован на правила, истакнувајќи дека токму меѓународниот систем ги штити нивните интереси.

„Се наоѓаме во ситуација во која мораме дополнително да го развиваме меѓународното право со оние земји што се залагаат за таков поредок“, рече Калас.

Истовремено, таа оцени дека принципите на Повелбата на ОН се „многу добри“, но дека механизмите за одговорност и отчетност сè уште се недоволни.

- 'Зависноста од други актери ја прави ЕУ поранлива' -

Калас, исто така, ја истакна потребата Европа да ги зајакне сопствените одбранбени капацитети, нагласувајќи дека зависноста од други актери ја прави ЕУ поранлива.

„На тежок начин научивме дека зависностите ве прават ранливи“, изјави таа.

Осврнувајќи се на ставовите на министрите за одбрана на земјите членки, кои често се повикуваат на националните буџети и одлуки, Калас рече дека со заедничко зајакнување на одбраната, ЕУ може да обезбеди поголема безбедност.

Таа, воедно, ги коментираше повиците за формирање европска армија, оценувајќи дека тие не се доволно практично промислени.

„Ако имате една армија и еден одбранбен буџет, а веќе сте дел од НАТО, не можете паралелно да создадете уште една посебна армија. Во кризни ситуации, најважен е синџирот на командување – кој дава кому наредби“, објасни таа.

Според Калас, постоењето на две одделни армии – европска и НАТО – би било „исклучително опасно“.

„Затоа велам дека мораме да ја зајакнеме европската одбрана како дел од НАТО. Таа е комплементарна со Алијансата. Да не го фрламе НАТО низ прозорец“, истакна Калас.