Alperen Aktaş
22 Јуни 2023•Ажурирај: 23 Јуни 2023
ПЕКИНГ (АА) - Кинеските научници открија потенцијално огромна резерва на ретки земјени минерали на Хималаите, што би можело значително да го подобри статусот на Кина како глобален снабдувач, објави „Саут Чајна морнинг пост“ (SCMP), пренесува Анадолу.
„За брзо идентификување на наоѓалиштата и стекнување со ‘стратешки предности’, геолозите од кинеската Влада предлагаат употреба на вештачка интелигенција (AI)“, се наведува во објавата.
Локацијата на наоѓалиштата, покрај јужната граница на Тибет, ја зголемува сложеноста на тековниот територијален спор со Индија.
Истражувачки тим поддржан од централната влада развива систем за вештачка интелигенција од 2020 година, кој е способен да обработува огромни количества сателитски и други податоци за прецизно да ги лоцира ретките земјени минерали на тибетската висорамнина.
Системот постигна импресивна стапка на точност од 96 отсто, според научниците од Државната клучна лабораторија за геолошки процеси и минерални ресурси на кинескиот универзитет за геонауки во Вухан.
Кинеските научници минатиот месец започнаа студија на Монт Еверест и на висорамнината Кингхаи-Тибет за да ги проучат климатските и еколошките промени во регионот, вклучително и ефектите од западните ветрови и монсуните.
