Количината вода по жител во Газа се намали од 90 на два литра

ГАЗА (АА) – ХУСНУ НЕДИМ -

Портпаролот на Општина Газа, Хусну Мехна, изјави дека хуманитарната криза во Газа, која сѐ повеќе се соочува со глад и жед, се влошила и дека количината вода по жител е намалена од 90 на два литра, јавува Анадолу.

Мехна во разговорот за Агенција Анадолу говореше за ситуацијата во Појасот Газа.

Тој нагласи дека хуманитарната помош што пристигнува до градот Газа и северните региони е многу важна, но недоволна.

„Ја предупредуваме јавноста дека доколку хуманитарната криза продолжи и понатаму да се влошува, бројот на жртви од глад и жед ќе порасне во северниот дел на Газа“, истакна Мехна.

Тој додаде дека количината вода по жител во Газа пред почетокот на војната била 90 литри, а денес е намалена на само два литра.

Појасни дека недостигот на вода е предизвикан од сериозни оштетувања на водоводните мрежи за време на израелските напади врз инфраструктурата и другите објекти.

- Уништена инфраструктура и недостиг на гориво -

Мехна рече дека израелската војска уништила 40 бунари, девет резервоари за вода, 42 илјади метри водоводна мрежа и 500 вентили со различен пречник и дека нема доволно гориво за работа на преостанатите бунари.

Истакна дека Општина Газа од почетокот на минатиот ноември не е во можност да испорача гориво и рече дека е потребно да се обезбедат основните услуги.

Тој додаде дека еколошките услови се на катастрофално ниво поради акумулирањето на околу 70 илјади тони ѓубре на улиците на градот Газа, особено околу болницата Шифа.

Мехна, исто така, истакна дека израелската војска уништила околу еден милион квадратни метри патишта само во градот Газа.

Како што рече, досега 27 лица умреле од глад и жед во Појасот Газа, каде што Израел предизвика масовно гладување со тоа што не дозволува влез на толку потребната хуманитарна помош.

По тужбата за геноцид поднесена од Јужноафриканската Република на 26 јануари Меѓународниот суд на правдата пресуди дека Израел мора да се воздржи од какви било дејства поврзани со убивање, напади и уништување на жителите на Појасот Газа и да ги преземе сите мерки за да спречи геноцид.

Но нападите продолжија со ненамалено темпо, а испораката на помош и понатаму е недоволна за справување со хуманитарната катастрофа.

Од 7 октомври минатата година во израелските напади врз Појасот Газа загинати се најмалку 31.112 Палестинци.