Колумбија: Бројот на загинати во земјотресот се зголеми на 265

Бројот на загинати во силниот земјотрес што во понеделникот ја погоди Колумбија се зголеми на 265, соопшти претседателот Абелардо де ла Есприела, јавува Анадолу.

Де ла Есприела соопшти дека најмалку 3.494 лица се повредени, додека 496 се водат како исчезнати.

„Нашите напори се насочени кон исчезнатите“, додаде тој.

Според процената на штетите што вчера ја објави Националната единица за управување со ризик од катастрофи (УНГРД), земјотресот предизвикал големи штети на домовите и јавната инфраструктура.

Вкупно 9.215 домови се уништени, додека 45.457 се оштетени.

Владата прогласи состојба на национална катастрофа со цел да се зајакне мобилизацијата и координацијата на институционалните капацитети за справување со вонредната состојба.

Исто така, соопшти дека националните знамиња ќе бидат спуштени на половина копје на сите јавни згради и колумбиските дипломатски мисии во странство во знак на сеќавање на жртвите.

Земјотресот се случил во 7:34 часот по локално време (12:34 часот ГМТ) во понеделникот, а епицентарот бил на околу 5 километри источно од градот Сан Хозе дел Палмар, според податоците на Геолошкиот институт на САД (УСГС). Институтот соопшти дека земјотресот се случил на длабочина од 107 километри.

Последователен земјотрес со магнитуда од 5,0 степени бил регистриран во 8:18 часот (13:18 часот ГМТ), на околу 16 километри западно од Сан Хозе дел Палмар.

Општината, која се наоѓа во департманот Чоко, има околу 4.800 жители и се наоѓа на надморска височина од 1.288 метри.