ЖЕНЕВА (АА) - Меѓународната комисија поддржана од Обединетите нации (ОН) во извештајот наведе дека израелските власти се одговорни за воени злосторства и злосторства против човештвото што се извршени за време на воените операции и напади врз Појасот Газа од 7 октомври минатата година, јавува Анадолу.
Независната меѓународна истражна комисија на ОН утврди дека израелските власти се одговорни за воени злосторства со изгладнување како методи на војување, убиства или намерно убивање, намерно таргетирање на цивили и цивилни објекти, принудно раселување, сексуално насилство, тортура и нечовечко или сурово постапување, произволно притворање и повреда на личното достоинство.
Комисијата утврди дека биле извршени и злосторства против човештвото со истребување, родово засновано прогонство на палестински мажи и момчиња, убиства и присилно раселување.
„Големиот број цивилни жртви и масовното уништување на цивилни објекти и на инфраструктурата во Газа беа неизбежен резултат на стратегијата преземена со намера да се предизвика максимална штета, занемарувајќи ги принципите на пропорционалност и соодветни мерки на претпазливост“, се вели во извештајот.
Исто така, беше наведено дека намерната употреба на тешко оружје со голем разурнувачки капацитет во густо населени области претставува намерен и директен напад врз цивилното население.
Што се однесува до изјавите на израелските власти, во извештајот се наведува дека нивната реторика довела до поттикнување и може да претставува други сериозни меѓународни злосторства, истакнувајќи дека директното и јавно поттикнување на геноцид е кривично дело според меѓународното право.
Комисијата, исто така, ги оцени и наредбите за евакуација издадени од Израел, нарекувајќи ги недоволни, нејасни и контрадикторни и дека не е дадено доволно време за безбедна евакуација.
„Понатаму, израелските сили постојано ги напаѓаа маршрутите за евакуација и областите означени како безбедни. Сето ова, утврди Комисијата, претставува принудно преместување“, се наведува во извештајот.
Понатаму се наведува дека Израел, исто така, наметнал целосна опсада, што претставува колективна казна против цивилното население и дека израелските власти ја искористиле опсадата за да го контролираат снабдувањето со животни намирници, вклучително и користењето на редуцирана вода, храна, електрична енергија, гориво и хуманитарна помош за стратегиски и политички цели.
Се нагласува дека опсадата несразмерно влијаела врз бремените жени и лицата со посебни потреби, со сериозна штета нанесена на децата што довела до смрт на децата од глад, вклучително и на новороденчиња.
Што се однесува на дејствата на Западниот Брег, Комисијата утврди дека Израел извршил акти на сексуално насилство, тортура и нечовечко или сурово постапување и повреда на личното достоинство, а сето тоа се воени злосторства.
Комисијата утврди дека израелската Влада, како и израелската војска, дозволиле и охрабрувале шема на агресија од илегалните доселеници насочена против палестинските заедници на окупираниот Западен Брег.
- Порака на ОН до Израел: Прекинете ги нападите, спроведувајте ги одлуките на МСП -
Во своите препораки Комисијата го повикува Израел да преземе итни мерки, вклучително и спроведување примирје, ставање крај на блокадата на Газа, обезбедување испорака на хуманитарни материјали и завршување со нападите врз цивилите и инфраструктурата.
Таа, исто така, го повика Израел целосно да ги исполни своите законски обврски утврдени со наредбите за привремени мерки на Меѓународниот суд на правдата (МСП) издадени на 26 јануари, 28 март и 24 мај и особено да ѝ дозволи на Комисијата пристап до Газа за спроведување истраги.
Исто така, препорача сите држави потписнички на Римскиот статут целосно да соработуваат со Меѓународниот кривичен суд.
„Израел мора веднаш да ги прекине воените операции и нападите врз Газа, вклучително и нападот врз Рафа, кој ги чинеше живот стотици цивили и повторно расели илјади луѓе на небезбедни локации, без основни услуги и хуманитарна помош“, наведе во извештајот Нави Пилај, претседателка на Комисијата.
- Порака на ОН до Хамас: Прекинете ги ракетните напади врз Израел, ослободете ги заложниците -
Во врска со нападот на 7 октомври врз Израел, Комисијата утврди дека военото крило на Хамас и шест други палестински вооружени групи се одговорни за „воени злосторства со намерно таргетирање цивили, убиства или намерни убиства, мачење, нечовечко или сурово постапување, уништување или лишување од имот на противникот, повреда на личното достоинство и земање заложници, вклучително и деца“.
Истакнато е дека „недискриминирачкото истрелување на илјадници проектили кон израелските градови, што резултираше со смрт и ранување на цивили, исто така, претставува кршење на меѓународното хуманитарно право и човековите права“.
Комисијата ги повика палестинските власти и де факто властите во Газа „веднаш да ги прекинат сите ракетни напади врз Израел, безусловно да ги ослободат сите заложници и темелно и непристрасно да ги истражат прекршувањата и да ги гонат одговорните за злосторствата, вклучително и оние извршени од 7 октомври од страна на странските припадници на палестинските недржавни вооружени групи во Израел“.
„Хамас и палестинските вооружени групи мора веднаш да ги запрат ракетните напади и да ги ослободат сите заложници. Земањето заложници е воено злосторство“, рече Пилај.
Истакнувајќи дека е императив сите сторители на злосторства да бидат повикани на одговорност, таа рече дека единствен начин да се запрат повторливите циклуси на насилство, вклучително и агресија и одмазда од двете страни, е да се обезбеди строго почитување на меѓународното право.
Извештајот на Комисијата ќе биде претставен на 56. седница на Советот за човекови права на 19 јуни во Женева. Се заснова врз интервјуа со жртви и сведоци, спроведени од далечина и за време на мисијата во Република Туркије и Египет, со илјадници ставки со отворен код, проверени преку напредна форензичка анализа, стотици поднесоци, сателитски снимки и форензички медицински извештаи.
„Израел ги попречи истрагите на Комисијата и го спречи нејзиниот пристап до Израел и окупираната палестинска територија“, се вели во извештајот.
