Кражбите по продавници во Англија и Велс достигнаа рекордно ниво

ЛОНДОН (АА) – Кражбите по продавници во Англија и Велс достигнаа рекордно ниво, со речиси половина милион инциденти регистрирани во годината до септември 2024 година, според најновите податоци на Канцеларијата за национална статистика (ONS), објавени денес, јавува Анадолу.

Вкупно 492.914 кражби од продавници биле евидентирани од страна на полицијата во овој период од 12 месеци, што е зголемување од 23 отсто во споредба со 402.220 случаи претходната година.

Ова претставува највисок годишен вкупен број откако почнале да се водат податоците во март 2023 година.

Зголемувањето на кражбите од продавници придонесе за пораст на вкупниот број кражби, при што полицијата регистрирала 1,8 милиони кражби, што е пораст од 2 отсто на годишно ниво, додека кражбите од лица се зголемиле за 22 отсто, достигнувајќи 146.109 случаи.

Од 473.342 случаи на кражби од продавници кои досега добиле исход, само 19 отсто (88.165) резултирале со обвинение или судски повик, што е подобрување од 16 отсто во однос на претходната година.

Сепак, 57 отсто (269.237) од случаите биле затворени без идентификација на осомничениот, бројка која останува непроменета од претходните 12 месеци.

Британскиот трговски конзорциум (BRC) предупреди дека кражбите од продавници „излегуваат од контрола“, при што трговците дневно пријавуваат над 2.000 инциденти.

Многу вработени во продавниците се соочуваат со напади, закани со оружје, како и расна или сексуална злоупотреба. Финансискиот товар од растечките кражби доведе до повторени повици за посилна акција од страна на полицијата и Владата.

Покрај зголемувањето на кражбите, се зголемија и нападите со ножеви, при што 55.008 случаи биле регистрирани во годината до септември 2024 година, што е пораст од 4 отсто во споредба со 52.969 случаи во претходната година.

Иако убиствата со употреба на нож се намалиле за 14 отсто, достигнувајќи 228, бројот на прекршоци со поседување нож останува висок 27.945, што е малку помалку од лани, но значително над нивото пред пандемијата.

- Одговор од Владата -

Владата вети дека ќе се справи со проблемот, со мерките поставени во минатогодишниот говор на кралот по изборната победа на лабуристите.

Еден од клучните предлози е нападот врз работник во продавница да се смета за специфично кривично дело, што го поддржуваат сопствениците на бизниси и пратеникот од Конзервативната партија, Мет Викерс.

Министерката за полиција, Дама Дијана Џонсон, призна дека бројките за кражби од продавници остануваат „неприфатливо високи“, опишувајќи го нивното влијание врз градските центри и главните улици како сериозно.

Таа ја критикуваше долгогодишната перцепција дека кражбите од продавници се „криминал од ниско ниво“ и ја потврди посветеноста на Владата за зголемување на бројот на полицајци и овластувањата на службениците за справување со сторителите.