Макрон оваа недела во посета на Кина со цел зајакнување на билатералните односи

ИСТАНБУЛ (АА) – Францускиот претседател Емануел Макрон оваа недела ќе отпатува во Кина со цел да ги зајакне односите „во новите околности“, соопшти кинеското Министерство за надворешни работи денес, пренесува Анадолу.

Тридневната државна посета ќе започне во среда, на покана на кинескиот претседател Си Ѓингпинг, се наведува во соопштението на Министерството.

Ова ќе биде четврта државна посета на Макрон на Кина, потврди портпаролот Лин Џијан.

Минатата година Си престојуваше во Франција по повод 60-годишнината од воспоставувањето дипломатски односи меѓу двете земји.

Односите меѓу Париз и Пекинг прераснаа во „сеопфатно стратегиско партнерство“, при што билатералната трговија достигна околу 80 милијарди долари.

Лин изјави дека кинескиот претседател ќе има разговори со Макрон со цел „заедничко насочување на развојот на билатералните односи во новите услови“ и размена на мислења за клучни меѓународни и регионални прашања.

Посетата на Макрон се случува во период кога САД ја засилуваат дипломатската активност за прекин на војната во Украина, а тоа се совпаѓа и со трговските тензии поврзани со царините на администрацијата на Трамп, како и со повеќе трговски прашања меѓу Кина и Европската Унија.

Франција е втора најголема економија во ЕУ, веднаш по Германија.

Си и Макрон разговараа и во мај, кога кинескиот лидер истакна дека Пекинг ја поддржува Европската Унија да развива „повеќе стратегиска автономија“.

„Кина секогаш ја гледа Европа како независен столб во мултиполарниот свет и ја поддржува ЕУ да има поголема стратегиска автономија“, изјави тогаш Си.

Лин, портпаролот на Министерството, денес изјави дека односите меѓу Кина и Франција имаат „скапоцена историја, уникатни вредности и важна мисија“, а двете страни имаат „плодна и практична соработка и ефикасна координација во мултилатералните прашања“.

Во услови на „динамична и турбулентна меѓународна ситуација“, Лин повика на засилување на стратегиската комуникација и продлабочување на практичната соработка меѓу двете страни.