Најмалку 11 Палестинци се убиени кога израелски авиони бомбардираа семејна куќа во Газа

АНКАРА (АА) - Најмалку 11 Палестинци се убиени во новите израелски напади врз Појасот Газа денес, додека смртоносните напади на Тел Авив врз енклавата продолжуваат со несмалено темпо, јавува Анадолу.

Очевидци изјавија дека израелски воени авиони нападнале семејна куќа во населбата Шеџаја во источниот дел на градот Газа.

Медицински извор изјави дека во нападот се убиени 11 лица, а 35 се повредени.

Изворот рече дека се очекува да се зголеми бројот на жртви бидејќи многумина од повредените се во тешка состојба.

Израелската армија ги обнови смртоносните напади врз Газа на 18 март и оттогаш уби речиси 1.400 лица, а повреди повеќе од 3.600 и покрај договорот за прекин на огнот и размена на затвореници во енклавата што беше потпишан во јануари.

Претходната недела израелскиот премиер Бенјамин Нетанјаху најави интензивирање на нападите врз Газа, додека се спроведуваат акции за реализација на планот на американскиот претседател Доналд Трамп за раселување на Палестинците од енклавата.

Од почетокот на израелската офанзива во октомври 2023 година досега во Газа се убиени над 50.800 Палестинци, повеќето жени и деца.

Во ноември Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант поради воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата поради војната против енклавата.