Најмалку 20 Палестинци се убиени во израелските напади врз Газа во текот на ноќта

ГАЗА (АА) - Најмалку 20 Палестинци, вклучително и неколку деца, се убиени во синоќешните израелски воздушни напади врз Појасот Газа, јавува Анадолу.

Портпаролот на цивилната одбрана Махмуд Басал изјави дека телата на 18 лица биле извадени од урнатините на три дома по израелските напади врз градот Газа и северно од енклавата.

Меѓу жртвите има и неколку деца, се вели во соопштението.

Еден маж и неговата сопруга биле убиени во израелскиот напад врз нивниот дом во бегалскиот камп Магази во центарот на Газа, изјави медицински извор.

Забележано е артилериско гранатирање во неколку области низ Газа, вклучително и јужните градови Кан Јунис и Рафа, но сè уште нема информации за жртви.

Израелската армија продолжи да ги крева во воздух палестинските домови во северните градови Беит Лахија и Џабалија користејќи роботи натоварени со експлозив, велат очевидци.

Израел започна голема копнена операција во северниот дел на Газа на 5 октомври, со цел да ја спречи палестинската група Хамас да се прегрупира. Но, Палестинците го обвинуваат Израел дека сака да ја окупира областа и насилно да ги исели нејзините жители.

Оттогаш не е дозволен влез на доволно хуманитарна помош, вклучително храна, лекови и гориво, во областа, оставајќи го преостанатото население на раб на глад.

Во бруталната израелска војна во Појасот Газа убиени се речиси 45.100 луѓе, главно жени и деца, од 7 октомври 2023 година.

На 21 ноември Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата за неговата смртоносна војна во Газа.