Нетанјаху: Цената на војната во Газа е многу висока за израелската војска

КУДС/ЕРУСАЛИМ (АА) - Израелскиот премиер Бенјамин Нетанјаху денес порача дека ќе ја продолжи војната во Газа и покрај нејзината „многу висока цена“ за армијата, јавува Анадолу.

„Ова е тешко утро, по многу тешкиот ден на борби во Газа“, рече Нетанјаху за време на состанокот на Кабинетот во Тел Авив.

Израелската армија денес соопшти дека 14 војници загинале во судирите со палестинските борци на отпорот во Појасот Газа во изминатите 24 часа.

Според воените податоци, бројот на загинати војници од избувнувањето на конфликтот во Газа на 7 октомври достигна 486.

„Војната има многу висока цена; сепак, немаме друг избор освен да продолжиме да се бориме“, рече Нетанјаху.

„Продолжуваме со полна сила до крај, до победа, додека не ги постигнеме сите наши цели: уништување на Хамас, враќање на нашите заложници и да осигураме дека Газа никогаш повеќе нема да претставува закана за државата Израел“, додаде тој.

Израелските напади врз Појасот Газа започнаа по нападот на палестинската група Хамас во Израел на 7 октомври. Во нападите на Израел, според здравствените власти во Газа, загинати се најмалку 20.424 Палестинци, главно жени и деца, а повредени се 54.036.

Нападите на Израел ја оставија Газа во урнатини со половина од станбениот фонд оштетен или уништен, со речиси 2 милиони луѓе раселени во густо населената енклава, каде постои голем недостиг на храна и чиста вода.