Ekip
21 Декември 2021•Ажурирај: 22 Декември 2021
ЊУ ДЕЛХИ
Индија започна со распоредување на рускиот ракетен систем за одбрана С-400 во северозападната држава Пенџаб, пренесува Агенција Анадолија (АА).
„Индиските воздухопловни сили го распоредија С-400 на западната граница за да се спротивстават на можните закани од Пакистан и Кина“, објави „Asian News International“ (ANI).
„Батериите С-400 ќе бидат способни да се справат со воздушните закани од Пакистан и Кина“, соопшти АНИ, цитирајќи локални извори.
„Русија почна да ја снабдува Индија со С-400 Триумф, мобилен и систем за ракетна одбрана земја-воздух преку воздушни и поморски патишта, што веднаш ќе биде распореден на одредените локации“, се додава од АНИ.
Првите испораки на моќниот руски ракетен систем за противвоздушна одбрана С-400 се очекува да бидат завршени до крајот на оваа година, а единицата ќе биде оперативна во следните неколку недели.
Воздухопловните сили ќе се фокусираат на источниот фронт по завршувањето на своето распоредување во државата Пенџаб и ќе обезбедат ресурси за обука на персоналот во земјата.
Во Русија, неколку офицери и персонал на Индиските воздухопловни сили веќе добија обука за системот.
Индискиот министер за надворешни работи, Харш Вардан Шрингла, на 6 декември изјави дека Русија започнала со испорака на С-400 до земјата.
Во 2018 година, Индија и Русија потпишаа договор вреден 5,5 милијарди долари, со што Индија беше изложена на ризик од американски санкции.
САД долго време се обидуваа да ги одвратат земјите од купување воена опрема од Русија, заканувајќи им се со казнени мерки според Законот за спротивставување на американските противници преку санкции (CAATSA), што го користеа против Турција, Иран, Северна Кореја и Русија.
И покрај предупредувањата на Вашингтон, Њу Делхи продолжи со купувањето, тврдејќи дека има стратешки врски и со Русија и со САД.
Американскиот секретар за одбрана Лојд Остин за време на неговата мартовска посета на Индија повтори дека сите сојузници и партнери на САД треба да го избегнуваат рускиот хардвер и „да избегнат секаков вид набавка што би предизвикала санкции.“
Турција тврди дека санкциите од Законот за спротивставување на американските противници преку санкции (CAATSA) се неправедни, бидејќи земји како Грција ја користеа руската воздушна одбрана без никакви санкции. Спротивно на американските тврдења, С-400 не е во интеракција со борбените авиони произведени од САД и затоа не го загрозува статусот на Турција како долгогодишен сојузник на НАТО.
