Од училиштен автобус до донерчилница: Младите од Ирак со необичен бизнис

Тројца млади пријатели од ирачкиот град Киркук го преуредиле автобусот што со години служел како училиштен превоз и веќе не се користел, па го направиле донерчилница.

Младите од Киркук, кои универзитетското образование го завршиле во Турција, по враќањето во татковината наместо да чекаат вработување во јавниот сектор, одлучиле да се занимаваат со трговија.

За време на студиите во Турција младите јаделе пилешки донер на хатaјски начин, им се допаднал вкусот и одлучиле да го донесат во Киркук и да отворат сопствен бизнис.

Со цел да го реализираат тоа што дотогаш го немало во градот, но и да заштедат на кирија за деловен простор, младите претприемачи преуредиле еден автобус и го направиле донерчилница.

Откако купиле автобус што со години се користел за превоз на ученици, младите претприемачи ја преуредиле неговата внатрешност во простор за седење и кујна.

Местото, кое младите од Киркук го нарекле „Донер бус“, поради високите температури во Ирак работи во вечерните часови.

Хусеин Ејад, иницијатор и сопственик на бизнисот, за АА изјави дека откако не добиле вработување по дипломирањето на универзитетот, тој и неговите двајца пријатели одлучиле да се обидат во прехранбениот сектор.

Објаснувајќи дека на овој чекор се одлучиле поради високите кирии на дуќаните и деловните простори во центарот на градот, Ејад рече дека работата ја започнале откако купиле автобус што по долгогодишна употреба како училиштен превоз бил отпишан како дотраен.

Ејад истакна дека со „донерчилницата во автобус“ создале работни места за себе, но и на жителите на Киркук им ја претставиле турската кујна.

Тој рече дека има голем интерес за пилешки донер на хатaјски начин, додавајќи дека е особено популарен бидејќи вкусот им одговара на вкусовите на жителите на Киркук.

Младиот претприемач истакна дека примаат нарачки и преку интернет и додаде дека добиле барања да отворат сличен бизнис и во главниот град Багдад.

– Во Киркук има голем интерес за турската кујна

Посочувајќи дека интересот за турската кујна во последните години постепено се зголемува низ Ирак, Ејад рече дека таков тренд се забележува и во Киркук.

Тој раскажа дека во градот се зголемува бројот на локали што нудат јадења од турската кујна, како донер, ќофтиња, пилешки пилав и ќебап, додавајќи дека токму тие први во Киркук понудиле пилешки донер на хатaјски начин.

– Клиентите се задоволни што турските вкусови пристигнаа во Киркук

Давут Сарикахја од Киркук рече дека е задоволен од иницијативата на младите, истакнувајќи дека за нив е особено убаво што и во Киркук може да ги вкусат јадењата од турската кујна.

Раскажувајќи дека при патувањата во Турција особено уживал во пилешкиот донер, Сарикахја рече дека донерот што се нуди во Киркук по вкус не се разликува од оној во Турција.

Абдула Јунус, исто така, рече дека со задоволство го јаде сочниот пилешки донер на хатaјски начин во Киркук, додавајќи дека додека јаде таму се чувствува како да е во Турција.

Јунус изрази надеж дека во Киркук ќе се прошират ваквите иницијативи, како и локалите што нудат јадења од турската кујна.