Околу 2.400 израелски уметници и архитекти бараат прекин на војната и крај на злосторствата во Газа

ЕРУСАЛИМ / ИСТАНБУЛ (AA) – Околу 2.400 израелски уметници, дизајнери и архитекти потпишаа две одделни петиции во кои бараат итен прекин на израелската политика на изгладнување, присилно раселување на Палестинците и воени злосторства во Газа, објавија израелските медиуми, јавува Анадолу.

Според медиумот „Вала”, околу 1.000 културни работници од Израел – меѓу кои и истакнати имиња од музиката, театарот, книжевноста и филмот – ја потпишале петицијата со која се повикува на „итен прекин на огнот во Газа“.

„Ние, уметниците на Израел, одбиваме да бидеме соучесници – против наша волја – во злосторствата што се случуваат во Газа: убиствата на деца и цивили, изгладнувањето, раселувањето и бесмисленото уништување на градовите“, стои во петицијата.

„Апелираме до лицата што донесуваат одлуки: Запрете! Не издавајте незаконски наредби. Не извршувајте воени злосторства. Не ги напуштајте етичките и хуманитарните принципи или вредностите на јудаизмот“, се додава во писмото.

Петицијата завршува со јасно барање: „Запрете ја војната. Вратете ги заложниците дома.“

Втората петиција, исто така објавена од „Вала”, била потпишана од речиси 1.400 визуелни уметници, дизајнери и архитекти. Таа го опишува насилството во Газа како „ужас од историски размери“ и предупредува на влошување на хуманитарната катастрофа.

„Израелската јавност сноси одговорност за тоа што се случува само неколку километри подалеку“, се наведува во текстот.

Претходно во неделата, Министерството за здравство во Газа соопшти дека бројот на Палестинци кои починале од глад како резултат на израелската блокада достигнал 175 лица, вклучувајќи 93 деца, откако започна израелската офанзива во октомври 2023 година.

И покрај меѓународните повици за прекин на огнот, израелската Армија продолжува со бруталната офанзива врз Газа од 7 октомври 2023 година. Досега, според палестинските извори, убиени се над 60.800 лица, од кои најголем дел се жени и деца.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.