ОН вознемирени од израелските предлози за присилно раселување на Палестинците надвор од Газа

ЖЕНЕВА (АА) - Високиот комесар за човекови права на Обединетите нации (ОН), Волкер Турк, денес изјави дека е многу вознемирен од предлогот на израелската Влада за масовно раселување на Палестинците од Газа, јавува Анадолу.

„Многу сум вознемирен од изјавите на високите израелски претставници за плановите за префрлување на цивилите од Газа во трети земји“, објави Волкер Турк на социјалната мрежа Х.

Наведувајќи дека 85 отсто од населението во Газа е веќе внатрешно раселено, Тирк истакна дека жителите имаат право да се вратат во своите домови.

„Меѓународното право забранува присилно преместување на заштитени лица или депортација од окупираната територија“, предупреди тој.

Израелскиот министер за национална безбедност, Итамар Бен-Гвир, и министерот за финансии, Безалел Смотрич, изразија поддршка за „доброволната миграција“ на Палестинците од Појасот Газа, повикувајќи ги другите земји да ги прифатат.

Изјавите на Гвир и Смотрич ги осуди меѓународната заедница, меѓу кои и Соединетите Американски Држави, Велика Британија, Германија и Франција.

Израел започна немилосрдни воздушни и копнени напади врз Појасот Газа по прекуграничниот напад на Хамас на 7 октомври, во кој, според израелските власти, загинале речиси 1.200 Израелци.

Нападите го оставија Појасот Газа во урнатини. Околу 60 отсто од инфраструктурата на енклавата е оштетена или уништена, а околу два милиона жители се раселени.

Оттогаш во израелските напади врз енклавата загинати се најмалку 22.313 Палестинци, а 57.296 се повредени.