Палестинската Црвена полумесечина: 180 жени раѓаат дневно во Газа среде израелските ограничувања

Палестинската Црвена полумесечина соопшти дека 180 жени се породуваат секој ден во Газа под опасни и нехумани услови поради израелските напади и окупација, пренесува Анадолу.

„Во Газа, 180 жени се породуваат дневно под опасни и нехумани услови. Многу од нив не можат да стигнат до болниците поради тоа што се наоѓаат во опколените области, а израелските сили ги спречуваат возилата на брзата помош да стигнат до нив“, се вели во соопштението.

За да се нагласи сериозноста на ситуацијата, хуманитарната организација сподели снимки на социјалната платформа Х.

На снимките се документирани телефонски разговори меѓу здравствените тимови и семејството на бремена жена која не можела навреме да стигне до болница за да се породи во Појасот Газа.

Лекар од палестинска Црвена полумесечина го води и му помага на семејството во аудио снимките, со цел да се олесни безбедното породување дома за жената која разговарала со нејзината сестра.

Претставникот на Фондот за население на ОН (УНФПА) за Палестина, Доминик Ален, на виртуелна прес-конференција во саботата од Кудс рече дека во Газа се случиле 18.000 раѓања во последните 100 дена.

Тој истакна дека УНФПА не може да обезбеди доволно резерви и дека состојбата во болниците е страшна.

Ален истакна дека во наредните месеци се очекува да се породат 5.500 жени и изрази загриженост за нивните борби со недостиг на вода, недостиг на храна и ограничен пристап до лекување.

Тој ги нагласи смртоносните ризици и ја подвлече итноста да се спречат ваквите трагедии.

- 45.000 бремени и 68.000 доилки во Газа се соочуваат со смрт

УНФПА објави на 17 декември дека 45.000 бремени и 68.000 доилки во Газа се изложени на ризик од анемија, крварење, па дури и смрт.

Портпаролот на Министерството за здравство во Газа, Ашраф ал-Кудра, на 1 јануари соопшти дека поради неисполнување на потребите на 50.000 бремени жени во центрите за сместување на раселените од нападите во Појасот Газа, пациентите се соочуваат со несоодветна исхрана и здравствени проблеми.

Ал-Кудра итно ги повика агенциите поврзани со ОН да интервенираат за да ги спасат децата и бремените жени од ситуацијата.