Папата Лав повика на крај на варварството во Газа, по нападот врз црквата

ЖЕНЕВА (АА) - Папата Лав денес упати повик за „итно запирање на варварството на војната“ по израелскиот напад врз католичката парохија „Свето Семејство“ во градот Газа, во кој загинаа тројца цивили, а неколку други беа повредени, вклучувајќи го и парохискиот свештеник, известува Анадолу.

Нападот се случи во четврток наутро во единствената католичка црква во Газа, во која се засолниле околу 600 луѓе.

Идентификувајќи ги жртвите како Саад Иса Костанди Саламех, Фумија Иса Латиф Ајад и Наџва Ибрахим Латиф Абу Дауд, Папата рече дека е „близок“ со нив и нивните семејства, објави Ватикан њуз.

Папата Лав во неговото денешно обраќање по молитвата „Ангел Господов“ во Кастел Гандолфо, град во Италија каде се наоѓа неговата летна резиденција, рече дека нападот „е само еден од континуираните воени напади врз цивилното население и местата за богослужба во Газа“.

Тој апелираше за „мирно решавање на конфликтот“ и ја повика меѓународната заедница да го почитува меѓународното хуманитарно право, особено „обврската за заштита на цивилите, како и забраната за колективно казнување, неселективна употреба на сила и присилно раселување на населението“.