Персискиот Залив Трамп ќе го нарекува „Арапски Залив“

АНКАРА (АА) – Според информациите добиени од неименувани претставници на американската администрација, претседателот на САД, Доналд Трамп, Персискиот Залив ќе го именува „Арапски Залив“ или „Заливот на Арабија“, известува Анадолу.

Според тоа, регионот, кој меѓународно е познат како Персиски Залив, Трамп ќе го именува како „Арапски Залив“ или „Заливот на Арабија“.

Портпаролката на Белата куќа, Каролин Левит, претходно соопшти дека Трамп ќе ги посети Саудиска Арабија, Катар и Обединетите Арапски Емирати од 13 до 16 мај.

- Различни називи

Американската војска веќе подолго време во своите соопштенија и објавени снимки еднострано за регионот го користи терминот „Арапски Залив“.

На Google Maps регионот е означен како „Персиски Залив (Арапски Залив)“, додека на Apple Maps се прикажува само како „Персиски Залив“.

Регионот што од 16 век е познат како Персиски Залив, многу земји од Блискиот Исток го нарекуваат „Арапски Залив“.

Областа што ги поврзува северниот дел од Арапскиот Полуостров и југозападниот дел од Иран со Индискиот Океан е значајна поради богатите наоѓалишта на нафта и природен гас.

- Полемики во 2017 година

Во својот прв претседателски мандат, во 2017 година, Трамп го користеше терминот „Арапски Залив“ за овој регион, што предизвика реакции.

Тогашниот ирански претседател Хасан Рохани изјави дека Трамп „треба да учи географија“.

Тогашниот министер за надворешни работи на Иран, Мохамад Џавад Зариф, изјави:
„Сите знаевме дека пријателството на Трамп му се продава на највисокиот понудувач. Сега знаеме дека и неговата географија се продава.“

- Полемики за Мексиканскиот Залив

На 20 јануари, со указ потпишан во Белата куќа, Трамп нареди Мексиканскиот Залив да се преименува во „Американски Залив“.

Во указот се вели:
„Претседателот Трамп носи разум во Владата и ги обновува темелите на американската цивилизација.“