Повеќе од 120 тела на убиени Палестинци извлечени од под урантините во Џабалија

ГАЗА (АА) - Повеќе од 120 тела на Палестинци се извлечени од под урнатините два дена откако израелските сили го напуштија кампот Џабалија во северниот дел на Појасот Газа, јавува Anadolu.

Медицински извори од болницата „Камал Адван“ за АА изјавија дека екипите на брзата помош и тимовите на цивилната одбрана ги извлекле телата на повеќе од 120 убиени Палестинци од урнатините на разорените згради во бегалскиот камп Џабалија и од уништените патишта, додека во тек е расчистување на шутот и урнатините.

Во петокот израелската армија објави крај на офанзивата во областа Џабалија по 20 дена. Тел Авив соопшти дека во офанзивата загинале 10 израелски војници.

Во израелските напади на Појасот Газа се убиени најмалку 36.379 Палестинци, од кои 15.328 деца и 10.171 жени, а 82.407 се ранети од 7 октомври минатата година.

Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од милион раселени Палестинци побараа засолниште.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.