Полска прашува кој е автор на мировниот план за Украина, Рубио инсистира дека тоа се САД

ЛОНДОН (АА) - Полскиот премиер Доналд Туск денес ја повтори подготвеноста да работи на мировниот план на Соединетите Американски Држави (САД) за Украина кој се состои од 28 точки, но праша кој е автор на истиот, поради тврдењата дека е во корист на Русија. Државниот секретар Марко Рубио за нацрт-планот инсистираше дека е изготвен од САД, јавува Анадолу.

„Заедно со лидерите на Европа, Канада и Јапонија, ја искажавме нашата подготвеност да работиме на планот од 28 точки и покрај одредена резервираност“, напиша Туск на американската компанија за социјални медиуми X.

„Сепак, пред да започнеме со нашата работа, би било добро да знаеме со сигурност кој е автор на планот и каде е создаден“.

Во заедничка вчерашна изјава, лидерите на Германија, Франција, Велика Британија, Италија, Шпанија, Финска, Холандија, Ирска, Норвешка, Канада и Јапонија, како и претседателите на Европскиот совет и Европската комисија, рекоа дека планот може да биде основа за разговори за ставање крај на војната, но нацрт-планот „ќе бара дополнителна работа“.

„Јасни сме по принципот дека границите не смеат да се менуваат со сила“, се вели во соопштението и се изразува загриженост во врска со предложените ограничувања за украинската армија.

Додека група американски сенатори го нарекоа планот руски „список на желби“, Рубио рече дека негов „автор“ се САД и дека е ставен на маса како „силна рамка за тековните преговори“.

„Тој се базира на придонес од руска страна. Но, исто така се базира на претходни и тековни придонеси од Украина“, истакна тој преку американската компанија за социјални медиуми X.

Нацрт-планот наводно бара од Украина да ѝ предаде дополнителни територии на Русија, да ја ограничи големината на својата војска и формално да се откаже од својата кандидатура за членство во НАТО. Претседателот Доналд Трамп му даде рок на својот украински колега Владимир Зеленски до четврток да одговори.

Зеленски, кој овласти делегација за преговори за планот во Швајцарија, рече дека се соочува со тежок избор - „губење на нашето достоинство или ризик од губење на клучен партнер“.

Русија ја започна својата „специјална воена операција“ во февруари 2022 година за таканаречена „денацификација“ и „демилитаризација“ на Украина. Освен ограничувањата за украинската војска и забраната за членство во НАТО, Москва сака рускиот јазик да има официјален статус во Украина.