Полска ја повика ЕУ да ја казни Мета со 250 милиони евра поради измамнички реклами

Полскиот министер за дигитални прашања денес ја повика Европската комисија да ѝ изрече казна од 250 милиони евра (291 милион долари) на Мета поради измамнички реклами и штетна содржина насочени кон полските корисници, јавува Анадолу.

„Овој Див Запад на платформата мора да заврши“, напиша Кшиштоф Гавковски на американската платформа за социјални медиуми Х.

„Исто така, ја повикувам Мета веднаш да воведе ефикасни алатки за елиминирање на измамите, лажното рекламирање и промоцијата на нелегални апликации“, додаде тој.

„Неактивноста и неуспехот ефикасно да се спротивстави на штетните реклами и измамничката содржина насочени кон полските корисници нема да бидат толерирани.“

Гавковски објави и дел од писмото упатено до Хена Виркунен, извршна потпретседателка на Европската комисија за технолошки суверенитет, безбедност и демократија.

„Размерите на овој феномен укажуваат на значителен проблем со начинот на кој функционира рекламирањето на една од најголемите онлајн платформи на единствениот европски пазар“, се наведува во писмото.

Апелот следуваше по обновената загриженост поради содржините со дипфејк-технологија, откако видео создадено со вештачка интелигенција, во кое се имитира полскиот претседател Карол Навроцки и се промовира измамничка инвестициска шема, наводно се ширело на Фејсбук.

Полскиот милијардер Рафал Бжоска, основач на компанијата за испорака на пратки „ИнПост“, исто така неодамна ја критикуваше неовластената употреба на неговиот лик во измамнички реклами на платформите во сопственост на Мета.

Мета соопшти дека борбата против измамничкото рекламирање е „еден од најсложените предизвици со кои во моментов се соочуваат дигиталните екосистеми“, што бара соработка меѓу платформите, владите и агенциите за спроведување на законот.

Компанијата соопшти дека отстранила околу 137.000 реклами што потекнувале од Полска во периодот од јули 2025 до јуни 2026 година, поради прекршување на нејзините политики за измами, при што повеќе од 88 отсто биле отстранети пред корисниците да ги пријават.

Гавковски, сепак, рече дека Мета не презентирала убедливи или ефикасни мерки за заштита на корисниците.