Aida Cako
02 Октомври 2025•Ажурирај: 03 Октомври 2025
ИСТАНБУЛ (АА) – Илјадници луѓе во повеќе светски градови излегоа на улиците за да протестираат по пресретнувањето на Глобалната флотила „Сумуд“ од страна на израелските сили, јавува Анадолу.
Демонстрантите го истакнаа растечкиот глобален гнев поради постапките на Израел и повикаа на укинување на блокадата врз Газа.
Во Турција, десетици илјади луѓе се собраа во Истанбул и други градови, марширајќи со транспаренти и извикувајќи слогани за да изразат солидарност со учесниците во флотилата и да ја осудат интервенцијата на Израел.
Тунис, исто така, протестираше против израелската интервенција против флотилата. Членови на конвојот „Магреб Сумуд“ истакнаа дека израелските напади нема да ја запрат мисијата и дека бродовите ќе продолжат кон Газа.
Аргентинците исто така се собраа во главниот град Буенос Аирес за да ги осудат израелскитe интервенции против флотилата, каде што, наводно, бил приведен и аргентински претставник од израелските сили.
Во меѓувреме, Либијците во Триполи се собраа на јавните плоштади за да протестираат против израелската интервенција.
Солидарност со Глобалната флотила „Сумуд“ беше изразена и низ цела Европа, а израелската акција против флотилата беше осудена.
Во Атина се одржаа собири и културни настани за поддршка на флотилата, додека во Италија избувнаа протести во Рим, Милано и Неапол, а синдикатите повикаа на штрајкови за да се осудат израелските интервенции против флотилата.
Организаторите на Глобалната флотила „Сумуд“ рекоа дека пресретнувањето се случило откако израелските воени бродови ги блокирале комуникациите и тргнале да го запрат конвојот. Меѓународниот комитет за пробивање на опсадата на Газа (ICBSG) потврди дека израелските сили упаднале на бродовите „Алма“ и „Сириус“.
Неколку активисти објавија видеа на социјалните мрежи потврдувајќи дека израелските воени бродови се приближиле до конвојот и им наредиле да го сменат курсот.
Флотилата, која пренесува главно хуманитарна помош и медицински материјали, тргна кон крајот на август и се очекуваше да стигне до брегот на Газа под нормални околности.
Ова е прв пат по многу години околу 50 бродови да отпловат заедно кон Газа, носејќи 532 цивили поддржувачи од над 45 земји до енклавата во која живеат 2,4 милиони Палестинци и која е под израелска блокада речиси 18 години.
