ПРОФИЛ - Валери Герасимов, новиот командант на руската војска во Украина

ИСТАНБУЛ/МОСКВА (АА) – Началникот на рускиот Генералштаб, Валериј Герасимов, е именуван за командант на руските сили во Украина, соопшти руското Министерство за одбрана, пишува Агенција Анадолија (АА).

Назначувањето на Герасимов е дел од неодамнешните големи назначувања во Воената команда на „специјалната воена операција“ на Москва во Украина од страна на министерот за одбрана, Сергеј Шојгу, во кои се вклучени и заменици кои ќе бидат покрај него.

„Меѓу замениците на Герасимов е генералот Сергеј Суровикин, врховен командант на воздухопловните сили; генерал Олег Саљуков, врховен командант на копнените сили и заменик-началникот на Генералштабот на Руските вооружени сили, генерал-полковник Алексеј Ким“, се вели во соопштението на руското Министерство за одбрана.

Назначувањето, исто така, се случи во време на наводи за промена во руската воена хиерархија, во која генерал-полковникот Александар Лапин беше назначен за началник на копнените сили на земјата, но не беше ниту потврдено, ниту демантирано за време на брифингот со новинарите од страна на портпаролот на Кремљ, Дмитриј Песков во вторникот.

Во меѓувреме, Суровикин е назначен за еден од замениците на Герасимов, откако тој претходно беше именуван за командант на руските сили во „специјалната воена операција“ во Украина во октомври.

„Зголемувањето на нивото на раководството на специјалната воена операција е поврзано со засилениот опсег на задачи, неопходноста од поблиска соработка меѓу службите и гранките на вооружените сили, како и за подобрување на квалитетот на сите видови одржување и ефикасност на командување“, соопшти Министерството.


- Кој е Герасимов?


Герасимов е роден во градот Казан во 1955 година во работничко семејство во тогашната татарска автономна Советска Социјалистичка Република, околу 800 километри источно од Москва.

По завршувањето на Военото училиште „Казан Суворов“ со почести во 1973 година, тој ја посетува казанската Висока тенковска командна школа.

Герасимов потоа се школувал на Академијата за воени оклопни сили „Малиновски“ во периодот меѓу 1984 и 1987 година, по што го продолжил образованието на Воената академија на Генералштабот на Вооружените сили на Русија каде дипломира во 1997 година.

За тоа време, Герасимов командува со силите во Далечниот источен воен округ на Русија и во Балтичкиот воен округ.

Од 1993 до 1995 година, тој е командант на моторизирана дивизија во Балтичкиот воен округ, а потоа и на Северозападната група сили.

Во периодот помеѓу 1997 и 2010 година, Герасимов служи како прв заменик-командант на Армијата во воениот округ на Москва, командант на 58. Армија во Северен Кавказ, како и командант на воените области Ленинград и Москва.

Во декември 2010 година, тој е назначен за заменик-началник на Генералштабот на Руските вооружени сили.

За помалку од две години, тој е назначен за началник на Генералштабот на Руските вооружени сили од претседателот Владимир Путин во ноември 2012 година, во исто време кога министерот за одбрана, Сергеј Шојгу, е назначен на неговата сегашна министерска функција.

Во истата година, тој стана член на Советот за безбедност на Русија.

Оттогаш, Герасимов е активен во руските воени активности, особено во Украина од почетокот на конфликтот во регионот на Донбас во 2014 година.

Во овој контекст, Герасимов е вклучен во тензиите во регионот, поради што е ставен на проширената листа на санкции на Европската Унија против високи руски функционери во април 2014 година.

Еден ден по почетокот на руската „специјална воена операција“ во февруари 2022 година, Герасимов беше додаден на листата на САД на специјално назначени државјани и блокирани лица.

- Награди и заслуги

Во 2016 година, Путин на Герасимов му ја додели највисоката почесна титула во Русија – Херој на Руската Федерација.

Герасимов и заменик-министерот за одбрана, Дмитриј Булгаков, станаа највисоко рангирани воени лица на кои Путин им ја додели титулата „Херој на Руската Федерација“ поради нивните операции во Сирија.

Други големи титули кои Герасимов ги доби се Орденот „Свети Ѓорѓи“ (3. степен во 2015 и 4. степен во 2017 година), Орденот за заслуги за татковината (3. степен во 2022 и 4. степен во 2014 година), Орденот „Александар Невски“ (во 2021 година), како и Орденот за воени заслуги и Орденот на честа.