Путин му честита на сирискиот колега за напредокот во обновувањето на територијалниот интегритет

МОСКВА / ИСТАНБУЛ (АА) - Рускиот претседател Владимир Путин денес му честита на својот сириски колега, Ахмeд ал-Шара, за напредокот постигнат во обновувањето на територијалниот интегритет на Сирија, јавува Анадолу.

Отворајќи го состанокот во Москва со Ал-Шара, кој е во втора посета на Русија за четири месеци, Путин ја изрази својата поддршка за сирискиот лидер.

„Внимателно ги следиме вашите напори за враќање на територијалниот интегритет на Сирија и би сакал да ви честитам за фактот дека овој процес добива на интензитет. Ние отсекогаш сме се залагале за враќање на територијалниот интегритет на Сирија, како што знаете, и ги поддржуваме вашите напори во овој поглед“, рече Путин.

Тој, исто така, истакна дека благодарение на напорите на двете влади, економската соработка „се поместила од мртва точка“ и неодамна се зголемила за околу 4 %.

„Ова можеби не е толку амбициозно колку што би сакале, но е значајно. И мора да направиме сè за да го зачуваме овој добар тренд“, додаде тој.

Претходно истиот ден, портпаролот на Кремљ, Дмитриј Песков, на прес-конференција во Москва изјави дека Путин и Шара ќе разговараат за прашањата поврзани со присуството на Руските вооружени сили во Сирија.

Во врска со извештаите дека сириските власти побарале повлекување на Русија од аеродромот во Камишли, Песков рече дека само Министерството за одбрана може да се справи со вакви прашања.

„Што се однесува до распоредувањето на нашите вооружени сили на територијата на Сириската Арапска Република, тоа е прерогатив на Министерството за одбрана. Препорачуваме да ги контактирате“, рече тој.

Денешната посета е втора на Шара на Москва во последните 4 месеци.