Русија тврди дека Трамп зазел подлабок пристап во решавањето на војната во Украина по состанокот на Алјаска

ИСТАНБУЛ (АА) – Москва денес соопшти дека американскиот претседател Доналд Трамп и неговата администрација презеле „подлабок“ пристап кон решавањето на војната во Украина по минатонеделниот состанок меѓу Трамп и неговиот руски колега Владимир Путин на Алјаска, јавува Анадолу.

„Претседателот Трамп и неговиот тим, особено по состанокот на Алјаска, имаат многу подлабок пристап кон решавањето на оваа криза, разбирајќи дека е потребно да се елиминираат основните причини за кои ние, претседателот Путин, постојано зборувавме“, рече министерот за надворешни работи Сергеј Лавров во интервјуто за државната телевизија Русија-24.

Во интервјуто Лавров рече дека имало „добра атмосфера“ за време на разговорите на Алјаска и, според него, тоа се одразило во изјавите на двајцата претседатели по состанокот, објавија државната новинска агенција РИА и руските медиуми.

Тој дополнително ги дефинираше разговорите како „корисна конверзација“, тврдејќи дека е „јасно“ оти Трамп и неговиот тим „искрено сакаат да постигнат резултат што ќе биде долгорочен, одржлив и сигурен“.

Лавров истакна дека ставот на САД е спротивен на европските земји кои „на секој чекор велеа дека е потребен само прекин на огнот и дека потоа ќе продолжат да ја снабдуваат Украина со оружје“.

Трамп и Путин во петокот одржаа тричасовен состанок зад затворени врати во градот Анкориџ во американската држава Алјаска, при што рускиот претседател рече дека постигнале „разбирање“.

Американскиот претседател, од своја страна, ги поздрави разговорите како „голем напредок“.